Qəmnən dogulacaq şairlər hələ,
nə qədər dünya var,pərti olacaq
bəlkədə dünyada sonuncu şair,
dünyanın sonuncu dərdi olacaq
2002
Gündə sərdənər sürünər,
anasız quzular mələr
köç qalxar,yurdu görünər
sinəm bir arxac yeridi
bitdim yolların boyunca
getdim bir xəyal olunca
könlüm köç eylər dalınca
yönüm mövlanə piridi
hər sevdada ayrılıq var
ayrılıqda sarılıq var
bu çəkdiyim ayrılıqlar
mənnən qəribdi,diridi
2000
Sirr
(Atillanın kiçik toyunda söylənən şer)
Bir sirr gəlir içimiznən
kökdə kökümüznən gəlir,
yerdə suyumuznan axır
göydə göyümüznən gəlir
sürür,südnən,sümüknən
çərtir,qannan iliknən,
yol gəlir elnən,elliknən
gələn,hamımıznan gəlir,
açılmır neçə qat söznən,
görünmür ikicə göznən,
ölən ölür ölümüznən,
qalan dirimiznən gəlir,
nədisə şirin duygudu,
pirrər yozdugu yuxudu,
sirr olan,sirrər oxunmur-
biznən gedir,siznən gəlir
30.12.2002
wwwfolklorumuz.azeriblog.com
TAHIR TALIBLI
